اكيد فى فترة فكرت تعمل جدول عشان تنظم بية وقتك عشان شغل او مذاكرة او عشان تنجز حاجة. والشى التانى الى بيحصل "بالنسبة لى" انى مش بانجز الحاجة دية و لو ضرورى اخلصها باخد وقت زيادة عشانها. وعن نفسى مش شايف ان من المنطقى ان الواحد ينظم وقتة عشان بس لو شغال فى شركة بتجبرة على الالتزام او فى ظروف تجبرة على كدة, فى حاجات بتكون بسبب قرار شخصى اهم بكتير من الحاجات الى فاتت.
طب ازاى اعمل جدول لتنظيم وقت الشغل... والتزم بية بجد ؟!
عشان الجدول يتنفذ لازم يكون واقعى للتنفيذ مش كلام على ورق, عشان كدة لازم يكون فية كذا حاجة, منها ..مرن, مفيش انسان طبيعى بيعرف يظبط وقتة بالدقايق و الثوانى.. لازم تعمل حسابك انك ممكن تقدم او تتاخر شوية فى تنفيذ الحاجة.
يكون فى فترة راحة مناسبة, ملهاش لزمة انك تقعد تشتغل ست ساعات لو انتا اول ساعة حتكون مركز و الخمسة الباقيين شايف شبورة قدامك مش قادر تركز و انتاجيتك فى الحضيض غير الضغط الذهنى و الزهق.
تقدر تلتزم بية, يعنى يحترم بقية اهتماماتك..لو انتا بتعمل الجدول دة عشان تنظم الفترة الى بتشتغل فيها (ما يتهياليش انك محتاج تعمل جدول لباقى اليوم -_-
) لازم يكون سايب وقت كفاية لبقية يومك.. سايب وقت كافى حتى للحاجات الى بتعملها فى وسط الشغل. (السبب دة الاهم عشان الاستمرارية)
طب عشان ما اقعدش اطول عليكم بكلام غالبا انتم عارفينة.. اية شكل الجدول دة ؟
لو افترضنا ان الوقت الى مخصصة للشغل دة من الساعة 12 ل8 . يبقى الانسب من وجة نظرى (المناسب ليا) انى اشتغل ساعة و بعدين استريح ربع او نص ساعة وبعدين اشتغل ساعة تانية و دواليك, وطبعا دة يفرق حسب طبيعة الشغل و طبيعتك انتا.
طب لو جربنا نحسبها بالطريقة دية.. على كدة ساعة الشغل حتاخد ساعة و نص (النص بريك) و قول فى ساعة بريك غدا فى وسط اليوم. ابقى انا اطلع بكام ساعة فى ال8 ساعات دول ؟
حضرتك تطلع بخمس ساعات... طب دول وحشين ؟
هو اكيد الاجابة نسبية لكن يتهيالى كويسين لكذا سبب
اولا توزيع البريكات فى وسط الشغل كتير بيخليك تفصل كتير فتركيزك مش بيضيع جامد زائد انك مش بتتخنق من الشغل المتواصل وراء بعضة. فبتلاقى نفسك فى حالة نفسية بتخليك تتقبل الشغل بشكل اكبر و تنتج بشكل افضل.
تانى حاجة لو انتا بتفضل تعمل حاجة واحدة بدل ما تشتت نفسك بعمل كذا حاجة فى نفس الوقت (مثبوت عمليا انها بتنقص الانتاجية للنص على الاقل, يعنى لو بتعمل حاجتين مع بعض فى نفس الوقت واخدوا ساعتين. لو عملت كل حاجة لوحدها وبعد ما تخلصها تعمل الحاجة التانية حتاخد فيهم هما الاتنين ساعة واحدة بس! زائد انها بتعمل ضغط زيادة و غالبا بتقلل جودة شغلك).
واخر سبب انك لو مصفى ذهنك بطريقة او باخرى... زى انك يكون معاك نوت تكتب فيها الحاجات الى بتقطعك و عاوز تفكر فيها لما تخلص الشغل او فى البريك عشان ما تقطعكش فى الشغل او تشغل بالك بانك عاوز تفتكرها.. دة حيفرق معاك كتير.
يتيهالى للاسباب دية حتخلى الخمس ساعات دول ليهم قيمة شوية. غير انك لو عاوز تزود بسبب ضغط او لغيرة ممكن تقلل وقت البريك (لربع بدل نص مثلا) او تزود وقت الشغل.
ياريت يكون البوست فاد حد, ولو فى اى كومنت اكتب و حارد فى اقرب فرصة ان شاء الله.
ليست هناك تعليقات:
إرسال تعليق